Pengertian lan Contoh-contoh geguritan basa jawa

GEGURITAN

   Geguritan yaiku sajinise karya sastra kang arupa puisi jawa
Unsur-unsur intrinsik :
1) tembung kang mentes/ nganggo diksi
2) tema
3) judul
4) amanat
5) basane endah
6) nganggo purwakanthi
7) citraan

Ciri-ciri geguritan :
1) diwiwiti kanthi tembung sungegurit (gagrag lawas)
2) nganggo patokan/ aturan (guru lagu, wilangan, gatra)
3) biasane sekawan gatra lan nganggo purwakanthi swara
4) basane mentes lan endah
5) ana aran pengarang/ pangripta

Model-model geguritan :
1) model naratif/ nyeritakake
2) diskriptif/ nggambarake
3) model lirik/ pasemon utawi kritikan utawi sindiran

Tuladhane :

KATRESNAN

(Muhamad Hanung)

Teka terang sawise udan

Srengenge sore kang padang jembrang

Akeh warna nag awan-awan

Angin sumilir samubarang

Gawe aku dadi kelingan

Dudu barang nanging kepenginan

Marang cah ayu kang wis sue aku tresnani

Sering aku mandheng slirahe kang putih bening

Mripate kangdene kaca cermin

Penampilane sopan ora feminim

Eseme kang legi

Nanging aku ora wani 

Njembar rasa kang ana ning ati

Amarga cah ayu kae wis duwe cinta sejati

Merapi

(Puthu Aryana)

Merapi...

Saka kadohan katon gagah

Asep putih ndedel ing awiyat

Tilas dalan lahar katon cetha

Kena sunare Hyang Bagaskara

Merapi...

Saumpama kowe bisa cerita

Kabeh kedadean ing tanah jawa

Wiwit jaman Mataram Kuna

Nganti madege Kraton Ngayogyakarta

Merapi...

Sliramu anyekseni kridhaning bangsa

Wiwit nalika ngusir penjajah Walanda

Jaman mardika jaman Soekarno

Nganti jaman Soeharto

Jaman Habibie gumekaning Megawati lan Susilo

Merapi dadi saksi

PAHLAWANKU

(R. Tantiningsih)

Pahlawanku

Wutahing ludirmu

Nyiram ibu pertiwi

Nadyan sang ibu

Kudu muwun sedhih

Karajang-rajang manahe

Karujit-rujit rasa pangrasane

Pahlawanku

Mugya Gusti paring nugraha

Semana gedhene baktimu

Jiwa raga, bandha donya

Tanpa sisa

Amung siji pangajabmu

Merdika

PEPELING

(Sendang Mulyana)

Aku ngugemi ngendikamu ibu

Nalika arep budhal sekolah

Nyangking tas kebak buku

Ngger ngendikane pujangga winasis

Ngelmu iku kelakone kanthi laku

Lekase lawan kas

Tegese kas nyantosani

Setya budya pangekese dur angkara

Pancen angel yen durung ketemu

Mula aja pegat sinau

Dadia wong pinter

Nanging aja keminter lan keblinger

Dadia wong sugih

Nanging aja sumugih

Dadia petinggi

Nanging aja ngapusi lan korupsi